Gen 3 | TVK | STEP | E Naho tahal Iden, tetal tei da en xa valongon mikas mili vongoro xil vus xa Iahova tepol ni. Xi bemei e misis atou ak, “?Reitin xa Hi biteni mi xamil bit mulnaxa huit vatiei xil vus ti xa di inggak?”

Genesis 3

Suse xa Tesaen Temei e Ut Etan

Senesis 3:1-24

1 E Naho tahal Iden, tetal tei da en xa valongon mikas mili vongoro xil vus xa Iahova tepol ni. Xi bemei e misis atou ak, “?Reitin xa Hi biteni mi xamil bit mulnaxa huit vatiei xil vus ti xa di inggak?”

2 E atou bit rilomun ni mini bit, “Makila malia huiei xil vus xa di e naho ak. 3 E vatiei tei takes xa de hilaep, Hi misep xole bit malnaxa ni ti e malnatuxoli ti. Vengan xa xosxa malia ni mu maltuxoli, malimat.”

4 E tetal bit rilomun ni mini bit, “E-e, ngan ak tave reitin ti. Mulinamat ti. 5 Hi biteni mak vengan xa mikila xa melele xa mulia ni, xamil mei mulixoni xi vari tang e mulekil naha xa bos e naha xa misa.”

6 Di, atou pusi xa vatiei ak bos, e huite mun, bos te anien en. E ien bei vasak pisi vahur kilakilen. Misak ni miroh huite vutei, e ngga ni. Di, misa vutei mi moletin nan, ma xi mun ngga ni. 7 Vat takes, nenemien nalu miluv e lukilakil. E lupus kila sung xa ludi hon, ma lube unoun ven. Misak ni, luleh ut fik xil, ^{▼▼3:7 ou fik nggoni oali.} lubar viton ni e lupis xol xalu ni.

8 E mahis nen, lulong Iahova bemei di bovarang e naho. Melele xa lulonge, luloh ba lunggus pe vatiei xil. 9 E Iahova mikes moletin bit, “?Moletin? ?Oda xave?”

10 E moletin bit rilomun ni mini bit, “Nalong xouk di okakao e naho. Ma uluk mikan vengan xa inou nada hon tang. Misak ni, ba nanggus ra xouk.”

11 Iahova misisi bit, “?Visi iaxa biteni mi xouk bit di ota hon? ?Midep? ?Xouk onga huiei xa natesep xolok ni tengan onaxa ni ti?” 12 E moletin biteni bit, “Atou xa xouk tang olingi de visal nou iaxa misa huiei ak minou ma nangga ni.”

13 Ma Iahova misis atou bit, “?Veneh ma opol ni mak?”

E xi biteni mini bit, “Tetal iaxa miluvos nou ma nangga ni.”

14 Di, Iahova biteni mi tetal bit, “Vengan xa opol ni mak, nilepis xouk tasom ra vongoro xil vus e holesok sav xil xa lameul. Pangasien xa nisa ni mi xouk imak: xosali ituxoh hoxalite te meulien nam, e melengien xil ngasen, ukea ni vangom e vulmeas iti e valongom vehakut. 15 Nipol ni xouk itel atou, ti iemil iat xamil, e tutom xil itel ngan xil na atou, iexil ti iat xil. Tuten nan xil ti lipel kikis vatum, e xouk, ti ukat e kaele.”

16 E mi atou, Iahova biteni bit, “Nisak ni ulonge isa ihe holu e marum ipangas ihe eilep mu e melele xa uhur tuvava. E tave ti neta xa ti ulong pangasuk, e uti ni ngan taxa eheien nam iti e moletin nam, e xi iaxa ihe vat nam.”

17 E mi moletin, Iahova biteni bit, “Xouk otelong xat rae atou nam, e otnalong xat nou ti. Otea huiei xa natesep xolok ni tengan onaxa ni ti. Ve naha xa opol ni, naling halesil tei ita xat tan. Isak ni, xosali iha, e melengien xil vus e meulien nam, xouk ti upol ixeih tengan ukamet anien xil listal lixo en. 18 Xouk ua anien xil tang xa lameul e tan xa di opol en, e husmunae tesa xil holu mun liteh en e limeul xole. 19 Ixo vetin te polien nam, ukamet anien am xil ha vuma ... umat, e umei mun uhe tan. Vengan xa natepol ni xouk ni tan, ma utilomun uhe tan.”

20 Moletin xa tetiamu, hisen tehe 'Adam' xa koute teni be 'moletin'. E atou nan, xi teling hisen tehe 'Iv' xa koute teni be 'meulien' vengan xa xi be vatit nana na moletin xil vus xa lameul ladi e ut etan. 21 Di, Iahova pol ni eising nalu ni hilbe vongoro e misa ni mi xalu lusing xol xalu ni.

22 Melele xa lusing bus, Iahova misep tasen bit, “Xosali ak, moletin bemei nggoni ratel nggo rin xa mei mikilakil ni naha xa bos e naha xa misa. Mak, ma ratnamae ni ti ha nahur huiei tei mun ra vatiei xa mikila vasa meulien xa hoxalite teni ihe tovuol. Vengan xosxa ia ni, misakras vamat.” 23 Misak ni, Iahova misil rat xalu ra Naho tahal Iden. E pol ni xalu lupol e tan xa xi tepol ni xalu ni. 24 Xi misil rat xalu bus, miling masxaxa xil xa lakes xil ni 'Serub' tengan liketeh xol suse xa ba be Naho tahal Iden e rin xa be ist. E Iahova miling tiei tei xa upang di pili en xa di bilhiles tengan isikoe xol suse xa ba ni vatiei xa di misa meulien xa hoxalite teni ihe tovuol.